Tarixi Zəfərin Qüruru və Bərdənin Dönməz İradəsi

​Müəllif: ŞÜKÜROV MURAD 

(Bərdə şəhərində ” V- İMPLANT ” KLİNİKASINDA   fəaliyyət göstərən həkim-stomatoloq)

​Xalqların tarixində elə anlar olur ki, onlar sadəcə təqvim səhifəsi kimi qalmir, bütün bir millətin taleyini, qürurunu və gələcəyini kökündən dəyişdirir. Azərbaycan xalqı üçün belə şanlı və əbədi bir an 44 günlük Vətən müharibəsində qazanılan Zəfər tarixi oldu. Müzəffər Ali Baş Komandanın rəhbərliyi və rəşadətli ordumuzun şücaəti sayəsində otuz illik həsrətə son qoyuldu, əzəli torpaqlarımız işğaldan azad edildi.

​Bir həkim kimi, insan sağlamlığına xidmət etmək mənim peşə borcum olsa da, müharibə dövründə gördüklərim və yaşadıqlarım mənə xalqımızın birliyinin, əzminin nə qədər sarsılmaz olduğunu bir daha göstərdi. Bərdə şəhəri cəbhə xəttinə yaxın bir məkan olaraq, müharibənin ağır günlərində mülki hədəflərin raket atəşinə tutulmasına şahidlik etdi. Lakin nə Bərdə sakinlərinin, nə də xalqımızın iradəsi bu təxribatlarla qırılmadı. Əksinə, hər bir bərdəli, hər bir həkim, hər bir vətəndaş cəbhəyə dəstək olmaq üçün əlindən gələni etdi, yumruq kimi birləşdi.

Şanlı Qələbə bizə sadəcə torpaqlarımızı geri qaytarmadı; o, həm də milli qürurumuzu, özümüzə olan inamımızı bərpa etdi. Bu gün işğaldan azad edilmiş Qarabağ və Şərqi Zəngəzurda aparılan genişqrafiklı quruculuq işləri, tikilən yeni yollar, modern tibb müəssisələri və bərpa olunan kəndlər Zəfərin davamıdır.

​Bu böyük qələbəni bizlərə bəxş edən azadlıq fədailərinə — canından keçən müqəddəs şəhidlərimizə əbədi borcluyuq. Onların xatirəsi hər birimizin qəlbində daim yaşayacaq. Sağlamlığını Vətən yolunda qurban verən qazilərimizə isə möhkəm cansağlığı arzulamaq, onların yanında olmaq həm vətəndaşlıq, həm də həkimlik borcumuzdur.

​Bu gün Bərdədə öz gündəlik həkimlik fəaliyyətimi davam etdirərkən qəlbimdə böyük bir rahatlıq və qürur hissi var: biz qalib ölkənin, məğrur xalqın nümayəndələriyik!

​Qarabağ Azərbaycandır!

BAŞ REDAKTOR : VÜQAR ABBASOV