Zəfər Tariximizin İşıqlı Səhifəsi: Şanlı Qələbəmiz və Qürur Hissimiz

​Aprel döyüşləri ilə təməli qoyulan, 44 günlük Vətən Müharibəsi ilə zirvəsinə çatan və lokal xarakterli antiterror tədbirləri ilə tam məntiqi yekununa çatdırılan Şanlı Qələbəmiz, Azərbaycan tarixinin ən parlaq, ən qürurverici səhifəsidir. Bu zəfər yalnız torpaqlarımızın azad edilməsi deyil, həm də milli mənliyimizin, bütövlüyümüzün və sarsılmaz birliyimizin bərpası idi.

​Müzəffər Ali Baş Komandanın qətiyyətli rəhbərliyi, ordumuzun misilsiz rəşadəti və xalqımızın dəmir yumruq kimi birliyi sayəsində 30 illik həsrətə son qoyuldu. Qarabağın hər bir guşəsində, Şuşada, Xankəndidə dalğalanan üçrəngli bayrağımız bu torpaqların əbədi sahibinin kimsə olduğunu bütün dünyaya sübut etdi.

​Biz həkimlər üçün insan sağlamlığı və həyatı hər zaman ən ali dəyər olub. Lakin Vətən müharibəsi günlərində şahidi olduq ki, qəhrəman əsgər və zabitlərimiz üçün Vətənin azadlığı hər şeydən — hətta öz canlarından belə üstün idi. Şəhidlərimizin qanı, qazilərimizin fədakarlığı hesabına qazanılan bu Qələbə hər birimizin üzərinə böyük məsuliyyət qoyur.

​İmişli rayonunun Cəfərli kəndinin bir sakini və bir tibb işçisi kimi xalqımızın bu tarixi nailiyyəti ilə dərin qürur hissi keçirirəm. Bizim mənəvi borcumuz bu zəfəri qorumaq, işğaldan azad olunmuş torpaqlarımızın bərpası və dirçəlişi naminə öz sahəmizdə var qüvvəmizlə çalışmaq, gələcək nəsillərə bu qəhrəmanlıq dastanını olduğu kimi ötürməkdir.

​Şanlı Qələbəmiz əbədi olsun! Allah şəhidlərimizə rəhmət eləsin, qazilərimizə şəfa versin!

​Müəllif:  Quliyev Xəyyam Elyaz oğlu

İmişli rayonu, Cəfərli kəndi, stomatoloq